Ardo eta edarien sektorea ikasteko,
ezagutzeko eta esploratzeko gune bat.

EDA Drinks & Wine Campusen prestakuntza-eskaintza Basque Culinary Centerreko Gastronomia Zientzien Fakultateak diseinatu eta emango du. Unibertsitate-gradu bat eta sei master aurreikusten dira eskaintza horren barruan. Era berean, profesionalentzako ikastaroak eta ardoaren eta edarien munduarekin lotutako tailerrak ere eskainiko dira, edo, profesionalak ez izanik ere, gastronomiaren zaleentzako ikastaroak. Helburua prestakuntza-gaitasunak garatzea da, eta etorkizuneko profesionalak trebatzea egungo tresnekin eta ikuspegi abangoardistekin. Prestakuntza horren xedea ez da jakintza eskuratzea bakarrik, baizik eta berritzeko gaitasuna sustatu nahi du, etengabe aldatzen ari den mundu honetara egokitzeko.

Basque Culinary Centerrek hamarkada batez baino gehiagoz ezarri dituen oinarriei jarraituz, Learning by doing hezkuntza-eredua baliatuko da, hau da, eginez ikastea, eta sektoreko balio-kate osoa hartuko du, aurrerapenak eta berrikuntza edozein edariren bizi-ziklo osoan parte hartzen duten eragile guztien eskura jartzeko.

Prestakuntza-programa horri forma emateko, ardoaren eta edarien arloko nazioarteko lehen mailako irakasle-talde bat izango dugu.

EDA Drinks & Wine Campus topagune izango da kontsumitzaileen, startup–en, upategien eta HORECA sektorearen artean (hotelen, jatetxeen eta kafetegien sektorea), eta soluzio berriak zehaztera bideratuko da:

• Sektoreari buruzko ezagutzak eskuratu ondoren, beren proiektuak bultzatu nahi dituzten ardogile eta edarigile berriei laguntzea.
• Elaboratzaile eta startup–en mentore izatea: jarduera-plan bat garatzea, inbertitzaileekin konektatzea, aukerak eta sinergiak bilatzea, sektorean ikusgarritasuna ematea…
• Ekintzaileentzako foroak ezartzea eta esperientziak trukatzea.
• Prototipoak sustatzea merkatua testatzeko, eta negozio-plana prestatzea.

Enpresen lehiakortasuna sustatuko duen motorra izan nahi dugu, eta laguntza eskaini nahi diegu merkatu gero eta zorrotzagoetan nabarmenduko diren proiektuak garatzeko urrats bakoitzean.

EDA Drinks & Wine Campusek berrikuntza funtsezko zutabetzat dauka sortu zenetik. Bere izateko arrazoiaren barruan sartzen da teknika, prozesu eta material berriak topatzea ardoaren eta edarien ekoizpenean kalitatea eta jasangarritasuna hobetzeko. Ikuspegi horrek enpresen lehiakortasuna sustatzen du gero eta zorrotzagoa den merkatu batean, eta, horretaz gainera, lehiakideetatik nabarmentzea eta etengabeko bilakaera bultzatzen ditu.

Horretarako, ikerketa-ildoak garatuko dira nazioarteko lehen mailako erakunde eta ikerketa-zentroekin, eta Basque Culinary Centerren teknologia- eta berrikuntza-zentro propioa izango da lanerako oinarri eta abiapuntu: BCC Innovation. Ardogintzari lotuta, askotariko faktoreak landuko dira: eskualde, herri, paraje eta lursail bakoitzaren karakterizazioa eta identifikazioa; landareen fisiologia; tokian tokiko baldintza klimatikoak; ezaugarri organoleptikoak; biotipoak; mentuak eta alkohol gutxiko barietateak. Era berean, hobekuntza genetikoari ere helduko zaio, klima- eta ingurumen-baldintza berrietara egokitzeko. Beste edari batzuei dagokienez, EDA Drinks & Wine Campusek alkoholik gabeko edariak garatzeko ikerketan lagunduko du, sektoreko enpresen eta tokiko, eskualdeko eta nazioarteko zentro teknologikoen laguntzarekin, edari horien elaborazio, sentsorialtasun eta marketinarekin loturik. Eginahal horretan, orpoz orpo arituko da sektoreko adituekin, aurreko guztiari buruzko errealitatea bertatik bertara ezagutu ahal izateko.

Ikerketa bultzatzean, orobat, edarien sektorea sakonago ulertzeko urratsak egiten ditugu. Sektore horren egungo eta etorkizuneko erronkei helduko diegu, haren hazkundea eta bilakaera sustatuko duten soluzio berritzaileak eta jasangarriak aurkitzeko.

EDA Drinks & Wine Campusek kongresuak, mintegiak edo tailerrak antolatu ahal izango ditu, bai eraikin propioetan, bai kanpokoetan. Hala, gastronomia likidoa eta proiektua bera sustatzeko dinamikak bultzatuko ditu Euskadin, estatuan zein nazioartean. Dinamika horrek jada eginak ditu lehenbiziko urratsak, besteak beste, Ardoaren Talentu Gazteen Topaketan edo edarien munduko joera berriei buruzko EDA Drinks Summit sinposiumean. Eraiki ondotik, Gasteizko eta Guardiako egoitzetako instalazioak sektore horrekin lotutako era guztietako ekintzen agertoki bihurtuko dira, Basque Culinary Center ekosistemari balioa emateko.